1918-yil 24-fevral – Estoniya Mustaqilligi kuni.
Estoniya – Sharqiy Yevropada, Boltiq dengizi bo‘yidagi davlat. Maydoni 45,2 ming km.kv. Poytaxti – Тallin shahri. Ma’muriy jihatdan 15 uezdga bo‘linadi. Estoniya hududi Sharqiy Yevropa tekisligining shimoliy-g‘arbiy qismida joylashgan. Estoniya qirg‘oq chizig‘ining uzunligi 3780 km. Qirg‘oqlari, ayniqsа, g‘arbiy va shimoliy-g‘arbi ko‘p parchalangan, qo‘ltiq va qo‘ltiqchalar ko‘p. Estoniya hududida 1500 dan ortiq orol va orolcha bor. Yer yuzasining katta qismi pasttekislik. G‘arbiy qismi va G‘arbiy Estoniya arxipelagi orollari hamda sharqiy chekkasining aksariyat qismi pasttekislik. Estoniyaning shimoliy va markaziy qismi balandligi 160 m gacha bo‘lgan to‘lqinsimon tekislik. Virts’yarv ko‘lidan janubiy-sharqda Estoniya hududining eng baland qismi – Xaanya (balandligi 318 m), Otepya qirlari, ulardan g‘arbda Sakala qiri bor. Asosiy qazilma boyliklari: yonuvchi slanes, fosforit, qurilish materiallari, torf, sapropel, shifobaxsh balchiqlar. Iqlimi dengiz iqlimidan kontinentallikka o‘tuvchi oraliq iqlim, sharqi va janubiy-sharqida kontinentallik ortib boradi. Estoniya aralash o‘rmonlar zonasida joylashgan. Hududining 40% o‘rmon; uning 2/3 qismi igna bargli daraxtlar. Shimoliy-g‘arbiy qismi va orollarda keng o‘tloqlar bor. Hayvonot dunyosi xilma-xil: sut emizuvchilardan los, yelik, kobon, malla quyon, oq quyon, bo‘ri, tulki; qushlardan qur, kaklik, karqur, bulduruq, ivolga va boshqalar yashaydi.
Foydalanilgan manbalar:
