9-may Xotira va qadrlash kuni
Qahramon bobo iltimosi.
Qarilik-da, "quloq - og'irroq”,
Qovoqlarim to'sgan ko'zimni.
Kimning bolasisan, shunqorim,
Beriroq kel, tanit o'zingni.
Qarilik-da, aybga yo'yma,
Kun sanamay qo'ydik buyog'i.
Qo'lingda gul, xoynaxoy yana,
Tabriklashga kelibsan chog'i.
Ha aytgancha, to'qqizinchi may...
Esladimmi, oshadi diqqat.
Gulingni ber, duo qilayin,
Urush haqda so'rama faqat.
Tinchlik haqda gapirgin, bolam,
Shuni istar bu – "ezma chollar”.
Biz urushdan ordenlar taqdik,
Sen tinchlikdan taqqin medallar.
Qismat ekan, "bomba”lar kechib,
Oyoq-qo'lni berdik urushga.
Sen ularni tinchlikka ishlat,
Jang xayoli tushmasin boshga.
Avtomatga suyandik bizlar,
Dunyo hamon chekadi ozor.
Sen ketmonni qo'lingdan qo'yma,
Daraxt ekkin, yaratgin gulzor.
Jangda o'ldi minglab iste'dod,
Ichda ketdi minglab pand-o'git.
Biz "qora xat” yozdik urushda,
Sen tinchlikka madhiyalar bit.
Yaxshi bo'lgin, hammadan yaxshi,
Toki bizni kechirsin olam.
Biz urushda odam o'ldirdik,
Sen insonni asragin, bolam.
Jang maydoni – o'lim maydoni,
Ajal bilan jangga kirishdik.
Gitlerini tanimayman men,
Biz urushga qarshi urishdik.
Bobolar ham g'animat, qo'zim,
Sening boshing ko'rmasin ofat.
Gulingni ber, duo qilayin,
Urush haqda gapirma faqat.
Qadrlasang, topasan qadr,
Yo'qlashingni savobga yo'ygin.
Cheksiz hurmat va raxmatimni,
Prezidentga etkazib qo'ygin.
Shoir Axtam RO'ZIMUROD
Xotira va qadrlash tushunchasi chuqur ma`noga egadir. Ushbu kunda fashizmga qarshi kurashishlarda qatnashgan, qolaversa O`z Vatanini himoya qilishda jonini fido qilgan, xalq orzu qilgan erkinlik uchun kurashgan milliy qahramonlarimizni ruhini shod etib eslash ham farz, ham qarzdir.
